Languages

خوش آمدید

ۻھترار رقبو لحاظہ صوبہ خیبر پختونخوا سفانسار لوٹ ضلع شیر وا کھلی صوبو 21 فیصد حصا 33 لوٹ وا 443 څیق دیہان سوم ݱانگ ݱانگ زومان اوانہ بولونجی شیر۔ ݯۻھترارو کھل آبادی تقریباً پونج لاکھ شیر۔ جغرافیائی لحاظہ ہیہ ضلعو مغرب اوچے شمال مغربو ویلٹی افغانستان، جنوبو ویلٹی دیر، شمالو ویلٹی واخان پٹی وا مشرقو ویلٹی گلگت بلتستان اوچے کشمیر شینی۔

ۻھترار وسطی ایشیاء اوچے جنبوبی ایشیو ثقافتو امبیژہ شیر۔ ہیہ ضلعا کھوارو سار غیر 13 خور وارہ لُو دیاک روئے دی ہال بونیان وا کالاݰ ݯھترارو څیق دی مشہور کوریکو لوٹ زریعہ اسونی۔ ہیہ ژاغا خور وار کوراک اوچے خور ثقافتو امین رویان موژی کھو اݰمارہ کھلی آبادیو 83 فیصد حصا اسونی۔ رابطو زبان کھوارو سار غیر گوار بتی، دمیڑی، پلولہ، مدک لشٹی، کلاݰہ، شیخانی، یدغہ، کاٹاویری، کرغیز، واخی، سریقولی، پشتو وا گجری زبانہ لُو دیاک ݯھترارہ ہال بونیان۔ ہیہ ژاغا ہر ای زبانو نمائندہ قبیلہ تان ثقافتو، شاعریو، موسیقیو، روایاتن، ہنر اوچے تمدنو تان اوانہ سومئے گونیان۔

کھوار کی ہوروتے بیریو روئے (چترالی) دی رینی ݯھترارو رویان اکثریتو وا ہیہ علاقو رابطو زبان شیر۔ ہیہ زبان ہند آریائی خاندانو دردِک شاخو سوم تعلق لاکھویان۔ ہیہ وارہ لُو دیاکان اݰمار تقریباً چھور لاکھ اوچے پھت شیر۔ ہیہ زبان ݯھترارار غیر گلتو علاقہ غذر، یاسین، پھنڈر، اݰکامن اوچے گوپیز وا سوات کالامو جُو دیہ اوشو اوچے مالٹیلٹانہ دی شیر۔ کھوارہ لُو دیاک پشاورہ، لاہورہ، اسلام آباد اوچے کراچیہ دی اسونی۔ کھوار اوچے خور زبانان موژی لفظان اوچے خور خصوصیاتان حوالا ضرور مطابقت شیر مگم وا دی کھوار تان ای کما مخصوص خصوصیاتان وجہین دیتی خطو خور زبانان سار زیاد اہمیت لاکھویان۔